Илдә ниләр бар икән
Татарстан язучыларының әсәрләре «Бөек Җиңүнең бөек китаплары» проектына кертеләчәк
Татарстан язучыларының китаплары «Бөек Җиңүнең бөек китаплары» проекты реестрына кертеләчәк, анда Бөек Ватан сугышы һәм совет халкының фашизмга каршы көрәштәге батырлыгына багышланган әсәрләр тупланачак. «Россиянең китап маяклары» фестиваль хәрәкәте президенты Денис Котов Казанда «Китап поезды» Бөтенроссия акциясенең пленар сессиясендә шул хакта сөйләде.
«Без «Бөек Җиңүнең бөек китаплары» проектын үзебез белән алып барабыз. Ул Җиңү белән бәйле китапларның бердәм реестрын формалаштыру өчен 60тан артык нәширне берләштерде. Анда 80гә якын китап бар инде. Батырлык белән бәйле, татар җирендә язылган бу басмаларны өстәп, Татарстан да әлеге проектка кушылырга теләк белдерде», - дип искәртте ул.
Моннан тыш, акция Бөек Җиңү белән бәйле иң әһәмиятле китапларны яңадан бастырып чыгаруны күздә тота. Әлегә шундый 40 әсәрнең исемлеге билгеләнгән. Алар арасында Алесь Адамович һәм Даниил Гранинның «Блокадная книга», Борис Васильевның «А зори здесь тихие...» китаплары һ.б. бар, дип өстәде Котов.
“Татар-информ” мәгълүматыннан
Казан аэропортында «Бөек Җиңү язы: Җиңү сәхифәләре» фотокүргәзмәсе ачылды
Габдулла Тукай исемендәге «Казан» халыкара аэропортының очып килү зонасында Бөек Ватан сугышында Җиңүнең 80 еллыгына багышланган «Бөек Җиңү язы: Җиңү сәхифәләре» фотокүргәзмәсе эшли башлады.
«Күргәзмә 1940 елларда Татарстан Республикасы Милли музее тупланмасыннан 33 рәсемнән тора. Фоторәсемнәр төрле вакыйганы чагылдыра: сугыш бетүгә якынлашып килүче вазгыять, Кызыл армия сугышчыларының борчылулары, тыл хезмәтчәннәренең батырлыгы һәм 1945 елның 9 нчы маенда Казанда бәйрәм тантанасы», - дип хәбәр итә Татарстан Милли музее матбугат хезмәте.
Сугыш чорында алгы сызыкка Татарстаннан 700 меңнән артык кеше киткән. Республикада җиде укчы дивизия, 91 нче аерым танк бригадасы, 37 нче зенит-артиллерия полкы, ТАССР Югары Советы исемендәге 202 нче бомбардировка авиация дивизиясе оештырылган.
Бөек Ватан сугышында Казан, Чистай, Алабуга шәһәрләре предприятие һәм гражданнарны эвакуацияләү урынына әверелгән. Татарстан шәһәрләрендә 50дән артык эвакуацияләнүчеләр өчен госпитальләр эшли башлаган, шуларның берсе - хәзерге Татарстан Республикасы Милли музее бинасында булган.
Сугыш чоры Татарстаннан герой-шагыйрьләр Муса Җәлил һәм Фатих Кәрим, летчик Мәгүбә Сыртланова, дошман амбразурасын үз эченә алган сугышчы Газинур Гафиятуллин, летчик-истребитель Михаил Девятаев, Брест крепостен саклауда катнашкан Петр Гаврилов һ.б. исемнәрен буыннар хәтерендә мәңгеләштерде, дип хәбәр итә музейның матбугат хезмәте.
Күргәзмә Татарстан Республикасы Милли музее, «Татнефть-Наследие «Тарихи һәм мәдәни мирасны саклауга ярдәм итү үзәге» автоном коммерцияле булмаган оешмасының һәм Габдулла Тукай исемендәге «Казан» халыкара аэропортының уртак проекты.
Фото: Татарстан Милли музее матбугат хезмәте