Йолдызлар илендә

Безнең йолдызлар

Безнең гимназиядә сәләтле һәм талантлы укучылар күп. Алар мәктәп һәм мәктәптән тыш түгәрәкләргә һәм секцияләргә йөриләр, иҗат һәм спорт белән шөгыльләнәләр. Без 7б сыйныфыннан интервью алдык, анда укучылар үзләренең мавыгулары белән уртаклаштылар.

«Мин биергә бик яратам. Миңа яңа хәрәкәтләргә өйрәнергә һәм төрле стильләрне, мәсәлән, хип-хопны сынап карарга ошый. Мин бию түгәрәгенә йөрим, анда без дуслар белән чыгышлар әзерлибез. Мәктәп чараларында да биим әле. Бу һәрвакыт күңелле һәм кызыклы.»

Кудреватых Валерия, 7б сыйныфы укучысы

«Бию – минем яраткан шөгыльләремнең берсе. Мин бию түгәрәгенә йөрим, анда без төрле стильләр белән шөгыльләнәбез, мәсәлән, хип-хоп. Тагын миңа мәктәп чаралары өчен биюләр кую ошый. Без дусларыбыз белән вакытны күңелле үткәрәбез, дәресләрдән соң репетицияләргә калабыз, үзебез бию хәрәкәтләре уйлап табабыз һәм музыка сайлыйбыз, бер-беребез белән сөйләшергә өйрәнәбез, чыгышлар өчен кием-салым җыябыз. Безнең сыйныф һәрвакыт менә дигән номерлар күрсәтә!»

Амирова Ассель, 7б сыйныфы укучысы

«Минем мавыгуларым бик күп! Мин үз вакытымны файда белән уздырырга һәм үз-үземне үстерүгә игътибар бирергә, төрле эшләр белән шөгыльләнергә тырышам. Хәзер мин пилон, һава боҗрасы белән шөгыльләнәм. Миңа әлеге юнәлешләр бик ошый. Минем тагын бер хоббием - бәйләү. Мин бик күп картиналар, кечкенә уенчыклар һәм файдалы әйберләр бәйләдем.»

Давидова Зилия, 7б сыйныфы укучысы