Ял иткән арада

1нче апрель- Бөтендөнья кошлар көне. Шул уңайдан бездә сыйныф сәгате  булып үтте.  Аңа әзерлекне алдан ук башладык. Укытучыбыз, һәркайсыбызга берәр кош исеме яздырып, материал туплап килергә кушты. Миңа сандугач дигән кош эләкте. Әни белән икәүләп, бу кош турында энциклопедиядән мәгълүмат җыйдык. Аннары сыйныф сәгатендә аны укыдым. Һәрберебез шулай үзенең кошы турында сөйләде. Бик күп яңалык алдык үзебезгә.
Сыйныф сәгатенең икенче өлешендә викторина сорауларына җавап бирдек. Ул кошлар темасына багышланган иде. Сезнең игътибарга да шул сорауларның берничәсен тәкъдим итәм. Кошлар турында белемнәрегезне тикшереп карагыз әле.
1.    Дөньяда иң кечкенә кош. Аның авырлыгы 1,6 грамм, ә озынлыгы.5,7см. Бу - артка таба оча ала торган бердәнбер кош.
2.    Бу кош очмый торган . Ул иң шәп йөгерүче дип исәпләнә. Хәтта сәгатенә 72 км тизлек белән чаба ала.
3.    Бу кош иң яхшы йөзүче булып исәпләнә. Ул сәгатенә 36 км тизлек белән йөзә ала. Шулай ук иң тирәнгә чумучы кош та ул. 1990нчы елда 483 м тирәнлеккә төшүе билгеле.
4.    Хәрби бүләккә ия булган бердәнбер кош. Беренче Бөтендөнья сугышы вакытында хат илткәндә, ул үзенең бер күзен һәм бер аягын югалта. Аңа  “Батырлык өчен” медале һәм протез аяк бирелә.
5.    Бу кош үзенең башын 270 градуска кадәр бора ала.
6.    Ни өчен карлыгачлар яңгыр алдыннан түбәннән очалар?
7.    Бу кошлар үз ояларын нәсел буенча тапшыралар. Иң карт оя 400 ел торган.
8.    Бу кош үзе бала чыгармый. Йомыркаларын башка ояларга салып чыга.
9.    Барлык кошлар да балаларын җәй көне генә чыгара дип уйлыйсызмы? Ялгышасыз. Бердәнбер кош үз балаларын кыш көне чыгара. Нинди кош ул?
10.     Тукранның кайсы төре Кызыл китапка кертелгән?

Сорауларга җавапларны рәсемнәрдән таба аласыз. Кошлар - безнең дусларыбыз. Саклыйк аларны.

 Гатауллина Алинә, 2а сыйныфы укучысы