Ноябрь 2024 ел

4 нче ноябрь – Халыклар бердәмлеге көне

4 нче ноябрьдә Россия халкы  Халыклар бердәмлеге көнен билгеләп үтте. 2004 ел ахырында РФнең Дәүләт Думасы 4 нче ноябрьне Халыкларның бердәмлеге көне итеп кабул итә. 2005 елдан бу бәйрәм Россиядә рәсми рәвештә үткәрелә. Россиядә төрле милләт һәм дин вәкилләре  дус, тату яши. Безнең республикабыз Татарстан – Россия составындагы иң алдынгы республикаларның берсе. Ноябрь  аенда туган төбәгебез әһәмиятле вакыйганы – Татарстан Республикасының Конституциясе кабул ителгән көнне  билгеләп үтә. Әлеге тарихи вакыйга 1992 елның 6 нчы ноябрендә була һәм ул республикабыз өчен сәяси, икътисадый һәм хокукый өлкәдә яңа мөмкинлекләргә юл ача. Шуңа күрә Конституция көне – Татарстан өчен иң мөһим бәйрәмнәрнең берсе.

Без, Г.Тукай исемендәге 1 нче гимназия укучылары, Халыклар бердәмлеге көне һәм Татарстан Республикасының Конституция көнен зур горурлык белән билгеләп үттек. Дәресләрдә әлеге истәлекле көннәр турында әңгәмәләр үткәрдек, рәсемнәр ясадык, эшлекле уеннар оештырдык.

“Россия бөркетләре” сафларына кабул итү

Башлангыч сыйныф укучыларына нәкъ менә ноябрь аенда “Россия бөркетләре”нең эмблемаларын тапшыру да тирән мәгънәгә ия. Безнең гимназиядә дә узган уку елында 1-4 нче сыйныф укучылары тантаналы шартларда ноябрь аенда “Россия бөркетләре” сафларына кабул ителде. Быел 1 нче сыйныф укучылары “Россия бөркетләре” сафларын тулыландырды. Алар Ватанны яратырга, тырышып укырга, игелекле эшләр кылырга, үз сүзеңдә торырга, дуслыкның кадерен белергә, кайгыртучанлык күрсәтергә һәм вөҗдан буенча эш итәргә вәгъдә бирделәр.