Март 2025 ел

Кояш көлеп карый безгә,

Күзләр чагыла.

Елгалардан бозлар ага

Диңез ягына.

Яз, яз, яз җитә,

Тәрәзәне ачтылар.

Тып-тып-тып итә

Эре-эре тамчылар.

Кышның салкыннарыннан соң без язны сагынып көтеп алабыз. Яз – ул табигатьнең кышкы йокыдан уяну вакыты. Зәңгәр күктә язгы кояш елмая. Өй кыекларыннан тамчылар тама. Язгы җылыдан кар эреп, гөрләвекләр ага. Җылы яклардан туган якларына кошлар кайта. Язгы җылы җил агачтагы яшь бөреләрне уята. Тиздән алар шаулап яфрак ярырлар. Кешеләр язгы эшләргә керешерләр. Урамда балаларның шат тавышлары ишетелә. Чөнки тиздән язгы каникуллар башланачак.

Гимназиядә яз ел фасылы – ул бәйгеләр чоры. Бу вакытта төрле фәнни-гамәли конференцияләр, иҗади бәйгеләр, олимпиадаларның республика этаплары уза. Укучылар көчләрен фән, иҗат, спорт өлкәсендә сыныйлар. Укучыларның иң-иңнәре нәкъ менә шушы вакытта билгеләнә.

Табигать белән бергә гимназия тормышы да үзгәрә. Укучылар актив иҗади тормыш алып баралар. Чыгарылыш сыйныф укучылары Соңгы кыңгырау бәйрәменә әзерләнә башлыйлар.

Туган җиребезгә яз килә, яз исе аңкый. Яз безнең тормышыбызны якты төсләр, уңай хисләр белән тутырсын һәм бөек эшләргә илһамландырсын. Үз көчегезгә ышаныгыз, яңа казанышларга омтылыгыз һәм елның бу матур вакытының һәр мизгеленнән ләззәтләнергә онытмагыз.

Яз − матур, шатлыкларга бай, күңелле вакыт. Хуш киләсең, ямьле яз ае!

Фәттахова Камилә,

11 нче А сыйныфы укучысы